سهرات ثورية

اشهر من الموت والدمار بكل معنى للكلمه
اشهر من الدعايات والنقاشات والحوارات والمظاهرات والتنسيقبات
اشهر من الرعب والخوف
اشهر ورائحة الدماء تعانق الهواء الذي نتنفس
والصبر والصمود والثبات يعمر القلوب بانتظار فرحة النصر وتنفس الحرية بعد اختناق
خلف كل هذا اثارا كثيرة منها ماهو باعماق النفوس وهلا الاكثر
ومنها ما طفى على السطح بمظاهر لايمكن ان تكون من عناوين ثورة كثورة اهل الشام المباركه
لعل الغالب اليوم ونظرا لفترة الموت التي طالت بدات الالسنة تكرر كلما ذكرت الاحداث او واجه احدنا مشكله بامنية وحسرة ليتها تعود ايامنا الماضيها
بعض الاشخاص في سهرة ثورية وكان الحوار التالي
ايــــــــــــــه الله يرحم ايام زمان
يرد احدهم خربت سورية لو ضالين متل اول كان احسن
يجيبه مؤيده صار السلب والنهب بالشوارع
- اي والله وكمان اي واحد الو تار عند واحد صار ينفذ اي حكم بدو ياه
- ماشفت طلع مسلحين بوجه جارنا واخذو سيارتو يقولو نحنا الجيش الحر
- اي وجارنا عندو ت*** شلحوه مصاريو وموبايلو
- يازلمه خطفو ابن فلان وطلبو 3 ملايين فديه
- اي صح وانا سمعت ابن فلان كمان بس هداك ابو مليان بدهم 10 ملايين
نطق الثالث
- لك بس قولو شو استفدنا من هالثوره؟
- ولاشي بس دمرو البلد
- تعرفو اليوم اشتريت كيلو بندوره ب45 وبطاطا ب40 وقنينة زيت ب200 يازلمه الاسعار ماعاد الها سقف كل يوم يطيروها بزياده
- اي والله صحيح
ماشفتو النازحين كمان طلعونا هدول باليانصيب ماعاد حتى الخبز نلاقيه من وراهم بطلوع الروح
- تعرف امبارح من الفجر رحت عالفرن حتى الساعه تسعه الصبح لحصلت بخمسين ليره خبز
- العمى الواحد ماعاد يعرف شو يعمل

- يلا نروح قبل ماتقطع الكهربا بكرا نشوفكم
سلام
- الله معك يالله كنا رايحين

كيفكم اليوم ان شاء الله احسن
- اهلين بيك احسن من وين
- خير شو في؟
-ماسمعت هالخبريه امبارح خطفو ابن التاجر فلان ال بدهم خمسه مليون
معقول؟؟
-اي والله خبر اكيد
-العمى والله خربت سورية
- شوف مين عالباب
-هذا المعقد اجى لمو عالموضوع
*السلام عليكم
- عليكم السلام -عليكم السلام-عليكم السلام[b]
-كيف المندسين اليوم؟
*احسن منكم بالتاكيد
- وليش احسن منا؟
*لانهم عايشين بالامل ويفكروا بشي بالمستقبل ويشتغلوا انو يحققوه بس انتم ياحسره بس تبكوا عالماضي
-لك قلي بالله عليك اول مو كان احسن عالاقل امان واستقرار وعايشين متل الخلق
*شوف عشان مانعيد ونكرر اسمع كويس
المرأة في حالة المخاض لايمكن ان تقيم وضعها على الوجه الصحيح وماتقدر تقول هي كويسه ولا لا وماتقدر تعيب عليها دماءها في تلك الحاله
وسورية في حالة مخاض والثورة ستولد بالحرية ان اجلا او عاجلا وما تقدر تحكم على وضعها الا بعد شفاءها من الجراحات ومنحها فترة حتى يتم الحكم عليها
والي تبكون عليه وصار كلامكم متل العلكه ليل نهار تعيدوه ماعندكم سيره غيرو اي امان من اربعين سنه ؟؟ مو كنا نخاف من كل شرطي ورجل امن وكتاب تقارير المخبر - ومااكثرهم لك نسيتو الواحد يخاف يحكي كلمه حتى قدام مرتو اي امان هذا؟
بعدين من ايمتا دولتك منحت امان لحدا كلنا بنعرف انو المجرم واللص والمحتال مايضل يومين بالسجن ويطلع وانتو بتعرفو هالشي منيح بقى اي امان هذا الي عم تبكو عليه؟
ماتذكر لما فاتو حراميه بعز النهار على محل ابو فلان وسرقوه ولما راح للجنائيه يقولو هات الحرامي لنحاسبو او تتهم حدا
لك من ايمتا جنائيتكم مسكت حرامي وحاسبتو ؟اللهم الا المساكين منهم والي ما عندهم شي يرشون الجنائيه يكونو صرفو المسروقات وحتى هدول اكثر من شهر شهرين ويطلعو
نسيتو الشرطي الي متل المنشار بس تصير مشكله يسحب من هاد وهاد
نسيتو القاضي الي ياخذ من الخصمين ويطلع الي يدفع اكثر
نسيتو شرطي المرور الي ما يسلم منو الرايح والجاي
نسيتو لما ياخذو واحد لانو الي يكرهو او مامشو شغلو يكتب فيه تقرير انو سب الرئيس يروح المسكين بيت خالتو عشر سنين وعشرين سنه وهما يسبو رب العالمين ليل نهار
شو بدكم ياجماعه تعملو سورية كانت جنه بعصر الخنازير
- خلصت حكيك عطينا فرصه نحكي
*هلا بدي روح جهز حكياتك لوقت تاني
-وين عالمظاهره هههههها
*اي عالمظاهره لك هي المظاهره ارعبت النظام وخلتو ما يعرف القبله من الشمال
بس انتو عميانين وقاتلكم الخوف
بتكفي المظاهره تشيل الخوف من قلبك لما تشوف شباب عارف انو يمكن باي لحظه يموت يتحدى الموت ويتحدى الظالم بكل جبروتو ويصيح بوجهو بدنا اسقاط الخنزير
لك انتا كيف قدرت تعمر غرفه عالسطوح لو ما هالمظاهره؟؟كم سنه تحاول تعمر وما يخلوك؟؟
يلا لاتاخروني بكرا اشوفكم
ادعونا
السلام عليكم
- وعليكم السلام انتبه لصوتك ل***وح وانتا تصيح هههههههه

ابوي كمل روعة الي عم تكتبو

يوميات الشارع الخائف

السلام عليكم8
- عليكم السلام
- عليكم السلام ها شايفك كل يوم تجي شو ماضل نيت
*اي والله
- اها..مو هاي الحرية الي تريدوها؟
= يازلمه حتى الموبايل قطعوه ها صار كم يوم
*ليش تصرون على عبارة الشبيحه هي هي الحرية!!
ليش مصرين على تقزيم الحرية وفق هواكم ومصالحكم؟
لك انتا صرت تبيع البضائع على كيفك رفعت اسعار كلشي بدون رحمه بهالشعب شو علاقتنا نحنا وشو علاقة الثوره والحرية بجشعكم وعدم خوفكم من رب العالمين؟؟
- هي مالها علاقه
الاسعار غلوها علينا
* والي كانت بمحلك وراسمالها قديم شو الي خلاك ترفع الاسعار ومارحمت اهل حارتك وجيرانك غير الطمع والجشع؟ شو علاقتنا بتصرفاتك
والنيت والاتصالات بيد مخلوف ايمتا ما بدو يقطعها ليش ما تحقدو عليه وعلى ابن عمتو بشار لانهم حصروا الاتصالات بيدهم كل هالسنين وما سمحو لكل شركات الدنيا بالاستثمار بسورية؟
= اتركونا هلا من هالحكي قلي شو ص*** بحارتكم صار كم يوم انفجارات ورصاص متل المطر؟
* هذا الجيش الحر هجم على الحواجز
= يازلمه راح يجيبوا الكم بلى ودمار
* صحيح عوا الكلام كتبنا وحكيينا صار شهور انو لاتساوو شي ضمن سكن الناس ولاحياة لمن تنادي
وفي حكي انو الامن نفسو يطلق كم رصاصه حتى يصير الي عم تسمعوه ويرعبو الناس
- شو هالحكي يازلمه الامن يطلق على بعضو!!
* اسمع
صار كم شهر وهما عالهالحه
واحد راكب دراجه ناريه يطلق كم طلقه ويرد الامن بالاف الطلقات وكانها الجحيم فوق منازل المواطنين وانتو عارفين الرعب الي يصير وقتها
سؤالي خلال هالشهور سمعتو حدا مات من الامن؟؟؟
سمعتو حدا مات من اهل الدراجات او قبضو عليه؟
= والله هاي بيدك حق فيها
- حق شو يازلمه واحد يجي يضرب الحاجز بالرصاص وعم نسمع كلنا
* ياعيني ماننكر في حدا يطلق بس كم واحد قتل من خمس شهور وجاي؟؟
- لحظه ارد عالموبايل شايفهم رجعوه
- مبروك رجع النيت
= ههههههههههه اكيد راح تستاذن هاي رجع
- العمى شوف وجهو كيف تغير هههههه
* بيدكم حق
يلا بالاذن السلام عليكم

ما شاء الله اخي المفكر.. كاتب شعر وكمان دراما ( مواهب متعددة )

رائع ما قرآت هنا .. من وحي الواقع الذي تعايش

آكمل على بركة الله ونحن لك متابعون

عسى أن يكون الفرج قريب


تحياتي

الاخت العزيزه همسات
يسعدني حضورك كما يسعدني تشجيعك الذي وجدته منذ البدايات والذي منحني الكثير من الثقة بالاستمرار
لاحرمنا الله من تواجدك واضاءاتك في منتداك
لاادري ان كانت الدراما تكتب بهذا الشكل
هي صورة واقعيه لحال افكار موجودة في الشارع يرددها الناس في كل مكان وسط هذا اللغط الذي عم المجالس اينما ذهب الانسان في هذا البلد المنكوب مما جعل الرؤية ضبابية بشكل مخيف فاختلط الحق بالباطل ولاحول ولاقوة الا بالله

اقتباس :

لاادري ان كانت الدراما تكتب بهذا الشكل
هي صورة واقعيه لحال افكار موجودة في الشارع يرددها الناس في كل مكان وسط هذا اللغط الذي عم المجالس اينما ذهب الانسان في هذا البلد المنكوب

بالتآكيد الدراما هي ما نعايش على ارض الواقع سواء كان حرباً او سلماً او ,, او .. او

بارك الله بعمرك وعملك

تحياتي ..

متابعة....

- سمعتو اليوم شوصار
- = خير
- * خير ان شاء الله ولو انو ماتجيب اخبار خير
- ههههه ياسيدي جماعتك الجيش الحر هجمو على راس العين ومافي كم ساعه هربت الناس على تركيا وعالقرى المجاوره وتركت لهم راس العين
- =اي
- قالو الجيش من الحسكه راح باتجاه راس العين والله يستر
- *لاحول ولاقوة الا بالله
الي حكو قالو جيش حر ولا عصابة الاكراد الاوجلانيه
-لا الجيش الحر
*غريب هاي من ضمن حلمهم بكردستان سوريه وعلى اساس حاطين ايدهم عليها مثل عامودا والقامشلي والدرباسيه لانو النظام باعهم اياها وطلع منها وهلا هم يديرون شؤونها
- الي سمعتو الجيش الحر وانو الاكراد عم يجهزو مع الحكومه عشان يروحو يطلعوهم
= تعرفو سمعت من واحد قرايبنا انو عشيرة البكاره راح تتدخل ضد الاكراد
• لاتستبعد النظام يتبع نظرية فرق تسد واكبر خدمه يقدموها لما يتقاتل الشعب بين بعضهم ويتركوه يتفرج
-هذا الي رايح يصير وبكرا تشوفو
* الله يستر
= اي استاذنا شو رايك بهالخبر
- يازلمه هلا يتفلسف ساعه ويصرعنا وماراح نفهم شي
- = هههه
- * هههههه لاطول بالك مو لهدرجه
- امزح معك والله اكثر كلامك عالجرح
- * ياسيدي شوف حكينا كثير عن خطأ الجيش الحر الفادح باكذوبة حررنا المنطقه الفلانية بعد كم يوم نلاقيه طلع منها بعد ما جاب الويلات على اهلها وسبب بتدميرها
- اي صح هاي فهمناها
- * التقت اوامر النظام مع راي المنظرين بالمعارضه ان تكون الحسكه والرقة ملاذا امنا للمدنيين الهاربين من جحيم الدمار في المدن المجاوره وهذا الذي حصل فقد وفد اليها عشرات الالوف من المدنيين وانتم تعرفون ذلك
- = اي صح
- * الاكراد استغلوا هذا الهدوء اقصد بالاكراد حزب العمال الكوردستاني وجناحه المسلح البي بي كي الذي يستعمله النظام للضغط على تركيا فهو القوه الضاربه الكرديه التي يتراسها عبد الله اوجلان
- = معروف هالشي
- *تمام
- * استغلوا هذا الهدوء والاتفاق غير المعلن بين النظام والجيش الحر لاظهار قوتهم والسعي للتهيئة لتحقيق حلم اكثر الاكراد باقليم لهم في سورية
- اي
- * بدأوا بايعاز من النظام يظهرون في شوارع المدن الشماليه بمظاهر التسلح العلني ويقومون بحفظ النظام وتيسير اكثر شؤون المدن ذات الغالبية الكرديه
- اي
- *ونظرا لغياب الدوله بشكل عام عن الشارع والفوضى التي عمت كثير من مفاصل حياة المواطنين من انتشار السرقه وقطاع الطرق والاحتكار والخطف دون اي تدخل من اجهزة النظام بينما حزب العمال يسير الامور في مناطقهم على اكمل وجه هنا بدات صورتهم تجد القبول لدى اكثر شعوب المنطقه وتتمنى المدن ان يكونون فيها ومنها مدينة الحسكه نفسها
- اي
- * وفي الفترة الاخيره فتحوا مركز في المدينة يشرفون عليه وكانه محكمه رسمية لتقبل شكاوى المواطنين وحلها على وجه السرعه وان ارتفع صوت عربي او كردي ضدهم يقتل او يخطف في اليوم التالي واكيد سمعتم كم حادثه من هالنوع
- - اي صح قتلوا ناشط كردي لانو يعمل مظاهرات ضدهم بتل حجر
- = وخطفو كم واحد كمان
- * صحيح
- كل هذا يبدو انه لفت نظر العرب في المعارضه وبدات تفكر كيف تمنع هذا الحزب من التوسع ولم يكن امامها الا الجيش الحر او من يدعون الانتماء اليه
- اي
- * الظاهر اعطو اوامر بالاتجاه لبعض المناطق في الحسكه كي يقولوا للاكراد اننا هنا ولا تحلموا كثيرا
- كيف يعني
- * يعني اتوقع ان يكرروا نفس الخطأ الذي يسيرون به في كل المدن ويبدأون بمواجهات مع النظام في الحسكه ومناطقها لتدمر كالمدن الاخرى
وحين تعم الفوضى تتحرك العشائر الجائعه والفقيره والتي همشها النظام طوال فترة حكمه للنهب والسرقة وبالذات من الاكراد والمسيحية كونهم كاليهود في هذه المنطقه سحبو خيراتها منذ زمن بعيد فكل المال والارض الخصبه والعقار بايديهم والعرب لايزالون يبحثون عن رغيف الخبز
عشيرة البكاره او بكارة الجبل كل اهالي الحسكه يعلمون ان معيشتهم لايتحملها بشر على وجه الارض فكل مالديهم زراعه تعتمد على المطر ومنذ اكثر من خمسة عشر عاما لم تحصد مناطقهم من القحط فاذا سنحت لهم الفرصه واظنها سنحت ونزل هؤلاء الى مناطق راس العين المجاوره لهم فلااظن ان قوة ستمنعم من الاستيلاء عليها باي ثمن
- يعني رايك راح العرب يحتلو المناطق الكرديه؟
- * هيك اعتقادي ستجري الامور لان متل ماتعرفو حتى وقت قريب البكاره يعملو مظاهرات تاييد للخنزير بحاراتهم وقراهم شو الي غيرهم فجأة؟
- = والله تحليل منطقي
- يازلمه شو منطقي؟ هدول يقاتلو النظام
- * لحد الان ماسمعنا مواجهات بينهم وبين النظام نستنى ونشوف
- الله يستر
- = واحنا ضعنا بين الرجلين
- * لاان شاء الله مانضيع
- = يااخي والله اليوم زرت بيت اختي لقيتهم يضبو غراضهم يجهزو حالهم للرحيل
- والله صحيح سمعت كثر نا بالحاره عم تجهز حالها حتى تمشي اول ما يصير طخ
- * ياجماعه وحدو الله والي كاتبو ربكم يصير والله ما نطلع مهما صار والموت يجي هون ولا بغير مكان
- وين بدنا نروح يعني اذا بلشت بالريف وين نروح
- = عالقرى
- اي قرى بالاخبار ماسكينها قرية قريه بطريقهم لهون
- = الله يستر
- * بدل مانفكر نهرب ليشم انفكر نحصل سلاح وندافع عن نفسنا؟
- منين السلاح
- = صار حق الباروده نص حق بيت
- * الله كريم بس تكون في عزيمه نحصل عليها وهاي البيت بدكم تتركوه وتهربو
- والله صعب
- = شوووووو اليوم طولتو بالسهره مافي نيت ههههههههه
- * اي والله مقطوع
- من هالشي ما شفناك تحوص بدك تروح عالسريع
- * يازلمه هاي صار ساعتين وكاسة شاي ماشربتنا شو يقعدنا عندك مابعرف هههه
- = هههههههه قوم ياول
- يلا المرا نايمه اروح اعملو انا
- =يلا قوم الله ياخذك

- =هلا بيك والله
- * الله يعطيك العافيه بس يكون الشاي حلو مو مثلك ههههه
- هههه لااتطمن حاسب حسابك اقدر انسى ليش ههه
- =شغل التلفزيون نحضر الموجز
- تكرم
(الاجتماع الوزاري في الجامعه العربية بالقاهرة يعقد جلسة مغلقه بحضور رئيس الائتلاف الوطني لقوى المعارضه السورية .....معنا مراسلنا هناك.....ينضم لنا المحلل السياسي.....معنا المعارض السوري.....-بعد حوالي نصف ساعه من جهة اخرى اعلنت تنسيقيات الثورة عن مقتل 140 في سوريه معظمهم من دمشق وريفها انتهى الموجز...)
- هات لنشوف يامحللنا العبقري هههه
- = ليش تتمسخر تحليلو احسن من الي عاملين حالهم بمليون مره
- امزح يازلمه
- *ولايهمك حبيبي كل انسان له رايه باي موضوع بالحياة بعض الناس يصل رايها لوسائل الاعلام والاكثرية مع الناس والمجتمع
لفت نظركم انو 140 شهيد وبشكل يومي يمر الخبر مرور الكرام كانو مو معناه 140 بني ادم شاب ورجل وامراه وطفل اعدمهم الخنزير؟ كانو مو 140عيله فقدت حبيب وعزيز من ابناءها ؟
كانو مو 140 مصيبة حلت على بيوت شاميه ؟ هذا عدا عن دمار البيوت والممتلكات ترى كم 140 ممن بقوا احياء ماتو من الرعب والخوف من صوت القذائف والصواريخ وبراميل المتفجرات؟
يارب رحمتك بعبادك ياالله يارب لطفك باهل الشام ياعزيز
-امين يارب
=اللهم امين
*المهم
الاجتماع في الدوحه
المباركه الفورية من واشنطن وباريس
انصياع معارضة الكراسي لها
رفض الكثيرين ممن لايبتغون كرسي او لهم اجندات خاصه كالاكراد لها
كل هذا يخلينا نوقف شوي
خلال ايام يجتمع المجلس الوطني الذي اعترف كل من كان به وخارجه انهم خلال اشهر الثوره لم يقدموا اي شيء لها وينتخب بسرعه قياسية رئيس مسيحي له واعضاء ومجلس تنفيذي وفي اليوم التالي يذهب الى الدوحه لينضم لائتلاف المعارضه الجديد بمناصبه وكراسيه فكيف يتفق هذا مع العقل مجلس برئيس واعضاء فاعلين ومجلس تنفيذي ضمن مجلس له ايضا نفس المناصب؟؟يعني حكومه ضمن حكومه!!!!
ياتي الاعتراف الخجل من العرب دون التكلم عن نتائج هذا الاعتراف وماذا سيثمر للمعارضه وللشعب السوري
تعلن باريس الاعتراف به ممثلا وحيدا للشعب السوري ليعودوا بذاكرتنا الى عبارة رددناها لعقود طويله بان منظمة التحرير الفلسطينية هي الممثل الوحيد للشعب الفلسطيني ترى هل ينوون ان يعوموا القضية السورية لسنين طويله؟؟
- فوتتني بالحيط ههه شوي شوي
- *ليش ؟
- شوجاب تحرير وفلسطين ومبعرف شو
- * هذا مثال على كلمة الممثل الشرعي الوحيد للشعب السوري الي عم يرددوها اليوم على كل لسان
- اي صح
- * المهم ياشباب بدي الفت نظركم لشغله تحير الحكيم
ليش من كم شهر يكررون الغرب والعرب انو لازم المعارضه تتوحد حتى نقدر نتعامل معها؟؟؟
-طبعا مو لازم يتوحدوا علشان الناس تدعمهم؟
= لازم يتوحدو شو لازم نروح ندور عليهم لنتعامل معهم؟
**طيب
كيف يعني نتوحد؟؟؟
هلا بكل العالم الديموقراطي مين يطلب من الاحزاب والشخصيات المعارضه ان تتوحد؟؟؟
مو اهم شي يميز الديموقراطيه انها متعدده الاراء والتوجهات والقناعات والسياسات والافكار والمبادئ؟
مو من اصول الديمقراطيه التعدديه والاعتراف بالاخر المعارض لك؟؟
شمعنا بالملف السوري يحطو هيك شرط؟؟
كيف اسلامي يتوحد مع سيوعي ملحد؟
كيف راسمالي ليبرالي يتوحد مع اشتراكي؟
كيف رجعي عشائري يتوحد مع جمهوري تعددي؟
كيف لكل انواع المبادئ السياسية ان تتوحد ممكن ياعالم الغرب الديمقراطي تفهمنا المقصود بالتوحيد الي تتطلبو من المعارضه وانت في بلدك تتباهى للعالم بان هناك احزاب معارضه للحزب الحاكم وتنافسه بالانتخابات ؟؟
-ياعمي انا دخت ماعاد اجمع هههه
*هههه الله المستعان
= هههه شرب حبة بنادول بس لاتكون مغشوشه مستوردها النظام من لبنان لانو وزير تابع لحزب الله منزل بلبنان ادويه فاسده
-خلوها على الله
= والنعم بالله
*يلا نستاذن السلام عليكم
-عليكم السلام لاتطولو الغيبه
= وعليكم السلام يلا رايح معك

* السلام عليكم
- وعليكم السلام
* خير وينو مو جاي اليوم صاحبنا
- مابعرف
* يلا انا ماراح طول
-خير شو في
*مافي غير الخير متل منتا تعرفن شايف الاحداث عم تتطور وبلشت توصل لدقنا
- اي
* مابعرف بس لازم اعمل شي بهيك وضع مو معقول ضل ساكت
- شو بدك تعمل يعني تروح عالقتال
* ليش لا مو احسن من قعدتنا مع النسوان
- لا مو احسن هنيك في موت اذا متت شو مصيرك واذا قتلت حدا كمان شو مصيرك
*تعرفني ضد القتل الا بحدود ضيقه كثير كثير ويمكن وجودي راح يجنب المدينه بلاوي
- ياعم مين يسمع ضايعه الطاسه
* والله محتار بس نخنقت طقيت من هالقعده بدون مااعمل شي
- خليها على الله هو يحلها
* الله سبحانه مو مع الخطأ واذا اجو لهون راح تخرب الدنيا واوضاعنا مو مثل اي مدينه سورية اخرى شعبنا مثل البقر همجي والله لاياكل بعضو بس تصير اي فرصه انفلات
- اي والله صحيح بس برجع اقول مابيدك شي
* المهم احاول وربك يدبر
- براحتك بس تراك غلطان
* يلا اشوف شو يصير معي رايح بدك شي
- لا سلامتك